Mir gengä ned haam, mir genga ned haam, bis dass der Giecher schreid.
Der Giecher, der is gscheid, wall er des Nochds ned schreid.
Mir gengä ned haam, mir genga ned haam, bis dass der Giecher schreid.

Lusdicherweis wern Leud, die die Nachd zum Dooch machn, als Nachdgieger bezeichned. Mer könnerd aa aweng übäschbizzd song, dass es sich hier um Hähne handeld, die in der Dungglheid umänanderschdolziern und versuung, möglichsd vill Eindrugg auf bodenzielle Sexualbardnerinnen zu machen.

Däbai is der Nachdgieger urschbrünglich wos ganz wos annerschds. Der will nämlich kann ins Bedd grieng, naa! Ganz im Geengdeil: Der schaud, dassdes ned bis ins Beddla schaffsd, waller Dich nämlich vorher auffrissd, wennerdi derwischd. Heud werd vermudlich seldener mid derlei Abschreggungs-Bädagogigg geärberd, obbä früher homm die Kinner in Franken gschaud, dass sie brov vor Einbruch der Dungglheid dahamm woän und rechdzeidich in die Heia gschlubbfd senn. Wall draußn auf der Schdroß do lauerd a unheimlichs Monsderwesn auf Beude.

Genau waaß mers ned, wie er ausschaud, der Nachdgieger. Manche soong aweng wie a Vambir, manche behaubdn, er hädd Flüüchl. Groß soll er sei. Ob er schreggli schreid, is ungewiss. Vermudlich hodder alle, die wos däzu song könnerdn, scho als Nachdveschber verschbeisd.

"Na, des is ja a komischer Vogl!" hör ich Sie song und Sie homm Rechd: Gieger, Giecher, Göchä, Geeger, Gäiger, Göcker, Gockerer und nuch viele weidere Noma hodd der Goggl in Franken. Alles midnandä onomatopoetische Wörder, wos nix anderschd bedeuded, als dass hier die Menschn des Dier nach den Lauten benannd homm, die des Viech von sich gibd. Und do giggeld, goggeld, gögerd sich a Gieger hald aweng so durch sei Leem.

Krähen konner scho aa. Machder aa den Dooch über. Bloß wenns dunggl werd, verschdummder blözzli und verwandeld si – wie Dr. Jekyll in Mr. Hyde – in den Nachdgieger, vor dem ganz Franggn erzidderd!

Hänsla und Reddl sabbm durchn Wald,
ball scho werds finsder und aa ganz bidder kald.
Die Sunna, die gedd unda, schnell haam im Dauerlauf!
Sunsd kummd der Nachdgieger und der frissd Euch auf! Hahahaha ...

"Fei Fränggisch" - unsere neue Rubrik

Des mit dem fränkischen Dialekt ist ja nicht so ganz einfach - also nicht falsch verstehen! Nicht nur zwischen Nordseeküste und Allgäu tun sich die Deutschen manchmal schwer, einander zu verstehen, auch innerhalb von Bayern ist das möglich. Das liegt an der Dialektvielfalt: "das Bayerische" oder "das Fränkische" gibt es ja gar nicht - stattdessen ostfränkisch, mainfränkisch, nord-, mittel- oder südbairisch oder das Schwäbische. Holla! In unserer neuen Rubrik "Fei Fränggisch" erklärt unser Autor David Saam in seiner unnachahmlichen Art ganz allgemeine oder auch mal ganz spezielle Dialektworte.