Sommerfeste

Vom April bis zum Oktober
geht’s beiuns kravotisch zua,
denn sowas wia Sommerfeste
hama mehra ois wia gnua.

Schule, Kirche und Vereine,
neamand mecht da hintn steh,
denn am Wochenend a Festl,
glaubn hoid viele, waar recht schö.

Alle hams fast`s gleiche Muster,
lautö Musö, Speis und Trank,
aa da Losstand derf net abgeh
mit vui Niatn, Gott sei Dank.

Denn dös Glumpzeug, dös ma gwinnat,
ko oan eh net recht lang gfrei
und scho meist nach a paar Tagn
steckt mas in an Müllsack nei.

Schmecka duats nach Kraut und Würstl
nachm Grill und aa nach Kaas!
Für dö selln, dös liaba süaß mögn,
gibt’s meist aa wos recht wos raars.

Wer a Fest macht, muaß drauf aus sei,
dass hernach dö Kasse stimmt,
denn es gaab an Katznjammer,
wenn mehr raus wia eine kimmt.

Dass dö Festl scho vui zvui san,
dös is absolut koa Lüag,
doch viele tausend Sommerfeste
san no gscheida wia oa Kriag.